Lev 24 | NdeIBE | STEP | UJehova wathi kuMosi,

Leviticus 24

Amafutha lesinkwa kubekwa phambi kuka Jehova

1 UJehova wathi kuMosi, 2 “Laya abantu bako-Israyeli ukuba bakulethele amafutha acengekileyo awama-oliva ahluziweyo awokukhanyisa ukuze izibane zihlale zivutha kokuphela. 3 Ngaphandle kwekhetheni lobuFakazi, phakathi kweThente lokuHlanganela u-Aroni kumele alinde izibane phambi kukaJehova kokuphela kusihlwa kuze kube sekuseni. Lokhu kuzakuba yisimiso esingayikuphela ezizukulwaneni zenu. 4 Izibane ezisoluthini lwegolide elihle phambi kuka Jehova kumele zilindwe kokuphela.

5 “Thatha ifulawa ecolekileyo wenze izinkwa ezilitshumi lambili usebenzisa okubili kwetshumi kwehefa isinkwa ngasinye. 6 Zibeke emizileni emibili, ziyisithupha emzileni ngamunye, phezu kwetafula legolide elihle phambi kuka Jehova. 7 Emzileni ngamunye faka impepha enhle njengengxenye yesikhumbuzo esimela isinkwa njalo kube ngumnikelo onikelwa kuJehova ngomlilo. 8 Isinkwa lesi kumele sibekwe phambi kukaJehova izikhathi ngezikhathi, amaSabatha wonke, kusenzelwa abako-Israyeli, kube yisivumelwano esingayikuphela. 9 Sizakuba ngesika-Aroni lamadodana akhe, abazasidlela endaweni engcwele ngoba siyingxenye engcwele kakhulu yesabelo sabo esifaneleyo kumnikelo onikelwa kuJehova ngomlilo.”

Owathuka uNkulunkulu utshaywa ngamatshe.

10 Kwakulomuntu owayeyindodana yomfazi owayengum-Israyeli, uyise engumGibhithe, wasuka waya ebantwini bako-Israyeli, wasexabana lomuntu wako-Israyeli ezihonqweni. 11 Indodana yomfazi wako-Israyeli leyo yahlambaza iBizo likaJehova, yathuka. Ngakho bayiletha kuMosi. (Ibizo likanina lalinguShelomithi, indodakazi kaDibhiri, owesizwe sikaDani). 12 Bayifaka entolongweni ukuba intando kaJehova ize yazakale kuhle kubo.

13 UJehova wasesithi kuMosi, 14 “Umuntu lowo owathukayo mkhupheleni ngaphandle kwezihonqo. Bonke labo abamzwayo kababeke izandla zabo phezu kwekhanda lakhe, ibandla lonke limgongode ngamatshe. 15 Yitsho kwabako-Israyeli uthi, ‘Loba ngubani othuka uNkulunkulu wakhe uzakuba lesono. 16 Loba ngubani othuka iBizo likaJehova uzabulawa. Ibandla lonke kumele limgongode ngamatshe. Loba kungowezizweni kumbe oyinzalo yelizwe lakini angahlambaza iBizo likaJehova kumele abulawe.

17 “ ‘Obulala umuntu kumele abulawe.

18 Obulala isifuyo somunye kumele ahlawule, kube okuphilayo ngokuphilayo. 19 Olimaza umakhelwane wakhe, loba ngayiphi indlela, kumele kwenziwe lakuye, 20 kube yikwephuka ngokwephuka, ilihlo ngelihlo lezinyo ngezinyo. Njengoba elimaze omunye, ngokunjalo laye kumele alinyazwe. 21 Obulala inyamazana kumele ayihlawule, kodwa obulala umuntu kumele abulawe. 22 Lizakuba lomlayo munye kowezizweni lakoyinzalo yelizwe lenu. Mina nginguJehova uNkulunkulu wenu.’ ”

23 Emva kwalokho uMosi wakhuluma kwabako-Israyeli basebethatha umuntu lowo owayehlambaze uJehova, bamusa ngaphandle kwezihonqo, bamgongoda ngamatshe. Abako-Israyeli benza njengokulaywa kwabo nguNkulunkulu.